తెలుగుతల్లికి ముళ్లపూదండ...

రావి కొండలరావు
(రచయిత చలనచిత్ర నటులు)

ఇద్దరు తెలుగువాళ్లు కలుసుకుంటే, ఏ భాషలో మాట్లాడుకుంటారు? కచ్చితంగా ఇంగ్లీషులో! ఒక తెలుగువాడు తనకు తెలియని తెలుగు ఊరికి వెళ్లి కావలసిన అడ్రసుకోసం ఏ భాషలో అడుగుతాడు? కచ్చితంగా ఇంగ్లీషులో! ఇదీ నేటి మన సంప్రదాయం, పద్ధతీ. తెలుగువాళ్లు తెలుగులో మాట్లాడుకోవడం నామోషీ. కాని, ''మేం తెలుగువాళ్లం, త్యాగరాజు మా వాడు. దేశభాషలందు తెలుగు లెస్స; సుందర తెలింగినిల్‌ పాటసేయ్‌ వోయ్‌- అని పరభాషా కవే అంగీకరించాడు! మన తెలుగును 'ఇటాలియన్‌ ఆఫ్‌ ది ఈస్ట్‌' అని మెచ్చుకున్నారు'' అని ఇంకో పక్క బాజా వాయించుకుంటాం. ఇదీ తెలుగువాడి లక్షణమే! నిజంగా మన భాష గొప్పదే. అందుకే ''జాతీయ స్థాయిలో తెలుగును గుర్తించాలి'' అని ఇప్పుడిప్పుడు పెద్దలు మేల్కొంటున్నారు. దానికంటే ముందు, మన ఊరి వాళ్లనీ, ఇంట్లోవాళ్లనీ, గుర్తించమనండి! ముఖ్యంగా పిల్లల చేత, 'డాడీ', 'మమ్మీ' పిలుపులు మానిపించమనండి! అమ్మను అమ్మా అని పిలవమనండి. ఎంత కాన్వెంట్‌ చదువులో గొప్పదనం ఉన్నా అ ఆలూ, ఓనమాలూ నేర్చుకోమనండి. ఊరికే ప్రతిదానికీ చంకలు కొట్టుకుంటూ- ''దేశంలో హిందీ తర్వాత ఎక్కువమంది మాట్లాడే భాష తెలుగే'' అని ప్రగల్భాలు పలకవద్దని చెప్పమనండి! మనకు భాషను బట్టి రాష్ట్రం వచ్చిన సంగతి మరిచిపోకండి. ఆంధ్ర రాజధాని దగ్గర్నుంచి ఏ తెలుగు ఊళ్లో ఏ ఉత్సవం జరిగినా, ఆహ్వానపత్రాలు ఇంగ్లిష్‌లోనే ఉంటాయి.. ఏదో అక్కడికి, తెలుగురాని వాళ్లకీ, బ్రిటిష్‌ దొరలకీ పంపిస్తున్నట్టు! ప్రభుత్వ కార్యాలయాల్లో లేఖలన్నీ తెలుగులోనే ఉండాలన్నారు. ఏదీ? అలా అంటే ప్రతి మాటకీ తెలుగు అర్థం రాయమని కాదు. దానికేదో తెలుగురాసి, అర్థం కానివ్వకుండా చేసేకంటే, అలా ఉంచేయడమే క్షేమం కదా! తెలుగు భాష పుట్టినప్పుడు, కొన్ని వస్తువులు పుట్టలేదు. రానురాను వచ్చాయి గనక, ఇంగ్లీషు పేర్లతో వచ్చాయి సబబే. రైలు, బస్సు, సైకిలు లాంటివన్నీ తెలుగులో కలిసిపోయాయి. వాటికి తెలుగు వెతికి- చేంతాడు సమాసాలతో తెలుగురాయడం- అవసరమా? కంప్యూటర్‌ అంటే అర్థం అవుతుందా? ఇంకేదో అంటే అర్థం అవుతుందా? సామాన్యుడికి కూడా అర్థమయ్యే ఇంగ్లీషు మాటలు కొన్ని ఉన్నాయి- రోడ్డు, బెంచి, పెన్సిలు, రబ్బరు లాంటివి. మాట ఇంగ్లీషుదే అయినా తెలుగులో కలిసిపోయినట్టే. ఎన్నెన్ని ఉర్దూ పదాలు, హిందీ, సంస్కృత పదాలూ వచ్చి ఆంధ్రభాషా సముద్రంలో కలవలేదు గనక! రోమన్‌, లాటిన్‌, గ్రీకు పదాలన్నీ కలిస్తేనే కదా ఇంగ్లీషయింది! అంతవరకూ అలా ఉంచండి. ఆ మాటలకు తెలుగు తర్జుమా కోసం తడుముకుంటే తెలుగువాళ్లం అయిపోయినట్టూ తెలుగుభాషను ఉద్ధరిస్తున్నట్టూ కాదు కదా!

భాషను బట్టే సంస్కృతి, సంప్రదాయం! మొదటిది పోవడంతో, తక్కినవీ పోతున్నాయి. ఎక్కడా తెలుగుదనం కనిపించదు, తెలుగు వాసనా కొట్టదు. నేతిబీరకాయలో ఉన్నంత నెయ్యీ మన తెలుగు సినిమాల్లో ఉంది; తెలుగుదనంలోనూ ఉంది. ఏ తెలుగు సినిమాలోనూ అమ్మాయి తెలుగింటి ఆడపడుచులా కనిపించదు. తెలుగు అక్షరాలు పలకదు. తెలుగులో శ, ష, స అని మూడు అక్షరాలున్నాయి. 'పలుకు'లో ఉన్న తేడా ఎవరికీ అక్కర్లేదు. పాడేవాళ్లూ, వార్తలు చదివేవాళ్ళూ, టీవీలో కార్యక్రమాలు వివరించేవాళ్లూ(వీళ్లని 'యాంకర్లు' అనాలిట) తెలుగు పట్టించుకోరు. ఒత్తులు పెట్టరు. లేదంటే ఇక్కడి ఒత్తు అక్కడా, అక్కడి ఒత్తు ఇక్కడా తగిలించేసి భ్రష్టుపట్టిస్తారు. 'తెలుగును తెలుగులా పలికేవాళ్లే లేరా?' అని నెత్తీనోరూ కొట్టుకునేలా చేస్తారు. ప్రతి అక్షరానికీ ఒక 'పలుకు' ఉంది. అది స్పష్టంగా పలికితేనే తెలుగు.. తేనె తెలుగూ తేట తెలుగూ.

తెలుగు భాషను నిర్మించిన మహా పండితులు మూర్ఖులా! ఋ, రు, రెండెందుకు పెట్టారని ఈసడిస్తున్నాం. 'ఋ'ని లాగేశాం. బండిర అనే'ఱ'ని లాగేశాం! ఋకి, రుకి పలుకులో ఎంత తేడా ఉంది! 'శుభ్రత'కీ సుబ్రహ్మణ్యానికీ ఉన్నంత తేడా ఉంది. 'ఱ' పలకడానికీ, 'ర'ని పలకడానికీ తేడా లేదూ? ఇవన్నీ తెలుగు భాష పలుకులు! తెలుగు పలుకులు! ఐనా, ఈ పలుకులు, అక్షరాల మాటకేం- ముందు తెలుగులో చక్కగా మాట్లాడమనండి! రాష్ట్ర ప్రభుత్వంవారు కేంద్ర ప్రభుత్వాన్ని అడుగుతున్నారు తెలుగును గుర్తించమని- అక్కర్లేదు, ముందు మన ఇళ్లలోని తల్లిదండ్రుల్ని గుర్తించమనండి! ''మా పిల్లవాళ్లకు తెలుగు రాదు సుమండీ, రాయడం అసలు రాదు'' అని గొప్పలు చెప్పుకొనే తెలుగువాళ్ల చేత, తమ భాషను గుర్తించేలా చెయ్యండి. లేకపోతే, ఇందాక చెప్పుకున్నట్టు- ''దేశంలో హిందీ తర్వాత ఎక్కువమంది మాట్లాడే భాష తెలుగే'' అన్నది- తారుమారై ''దేశంలో అతి తక్కువమంది మాట్లాడే భాష తెలుగు భాష'' అని చెప్పుకొనే పరిస్థితి రాక తప్పదు.

Courtesy: ఈనాడు
Technorati tags: Telugu,తెలుగు