బ్లాగు భాషలందు తెలుగులెస్స!

Article Courtesy: ఈనాడు

ఇల్లు, ఆఫీసు, పార్టీలు, పిచ్చాపాటీలు... రేడియో, టీవీ, ప్రకటనలు, సినిమాలు... ఇలా ఒకటేమిటి, ఎక్కడ చూసినా ఇంగ్లిష్‌... ఇంగ్లిష్‌... ఇంగ్లిష్‌. మాట, రాత, చదువు అంతా ఆంగ్లమయమే! అయితే ఇదంతా నాణానికి ఒకవైపే. మరొకవైపు... ఆన్‌లైన్‌లో రోజురోజుకీ విస్తరిస్తున్న తెలుగు బ్లాగుల వెలుగులు జిగేల్‌మంటాయి! కథలు, కార్టూన్లు, కరుణశ్రీ పద్యాల దాకా కావేవీ బ్లాగ్‌లకనర్హం అన్నంతగా దర్శనమిస్తాయి!!

ఆలస్యంగా మొదలుపెట్టినా ఆంధ్రావాలాలు బ్లాగ్‌ల ఏర్పాటులో బాణపరంపరగా దూసుకుపోతున్నారు. ఆంగ్లానికి సంబంధించిన వాటి గురించి ఇంకా చెప్పేదేముంది? రెడిఫ్‌, వర్డ్‌ప్రెస్‌, బ్లాగర్‌ ప్రతి దాంట్లో మన వారివి కనిపిస్తూనే ఉన్నాయి. తెలుగులో బ్లాగ్స్‌ నడుపుతూ చెలరేగిపోవడమే తాజా కబురు.

నిన్న మొన్నటిదాకా ఆంగ్లంలో బ్లాగ్‌ తెరిచే తెలుగు విదేశీయులే ఎక్కువ. ఈ మధ్యన ఆ తీరు మారుతోంది. అందువల్లే పదులు, వందల సంఖ్యలో ఉన్న తెలుగు బ్లాగ్స్‌ నేడు వేలల్లోకి చేరాయి. వీటిల్లో సుమారు 40 శాతం చక్కటి అంశాలను అందిస్తుండటం ఓ విశేషమైతే, వాటిని చూసే నెటిజన్లు పెరగడం అంతకుమించిన ఆశావహ పరిణామం.

ఆకట్టుకునే పేర్లు
రంగుల ముగ్గు మనసుకు హత్తుకొని రా రమ్మని స్వాగతం చెప్పినట్టు ఒక్కో బ్లాగు పేరు 'భలే పెట్టారే' అనిపించేలా ఉన్నాయి. తెలుగుదనం, వసంతకోకిల, జాబిల్లి, శ్రీకారం, పూతరేక్స్‌, సాలభంజికలు, వాగ్దేవి, దీప్తిధార... ఇలా ప్రతి బ్లాగూ పేరుతోనే ప్రశంసలు మూటగట్టుకొంటాయి. తెలుగు పదాల తీపిదనాన్ని రుచి చూపిస్తాయి. కొన్నింటి పేర్ల కింద బ్లాగు స్వరూపాన్ని పరిచయం చేస్తూనో, తమని తాము పరిచయం చేసుకుంటూనో రచయితలు చక్కటి ట్యాగ్‌లైన్స్‌ ఉంచారు. ''నాలో రేగే ఎన్నో ఆలోచనలలో కొన్ని అందరితో పంచుకునేందుకు...'' అని Sodhana.blogspot.com లో కనిపించి అలరిస్తుంది.

ప్రయోజనం పెరుగుతుండాలి...
ఒక్కో బ్లాగు ఒక వ్యక్తి రాసుకునే డైరీ లాంటిది. జానపదాలు, రాజకీయాలు, తేనెకబుర్లు, శృంగార గుళికలు... మనసుకు నచ్చిన ఏ అంశం మీదైనా దాన్లో రాసుకుంటూ పోవచ్చు. రోజూ రాయాలని లేదు. తరచూ రాస్తే, చక్కటి జోడింపులు (పోస్టింగ్స్‌) కొనసాగిస్తే.. చదివే మిత్రులు, అభిమానులు పెరుగుతారు. 'నాకు నచ్చింది నేను రాస్తా' అని కాకుండా సమాచారం, విజ్ఞానం అందించే ఇతర సైట్లకు, బ్లాగులను అనుసంధానిస్తున్నారు. దీనివల్ల బ్లాగు ప్రేక్షకులకు ఆనందానికి ఆనందం.. ప్రయోజనానికి ప్రయోజనం. మేడిన్‌ ఆంధ్రా బ్లాగర్స్‌ వీటిని బాగా ఒంటబట్టించుకున్నారు. కొన్నింటిలో Webduniya.com, Msntelugu.com, in.telugu.yahoo.com వంటి వార్తా విశేషాలను అందించే వెబ్‌సైట్లూ దర్శనమిస్తాయి. ఇంకా.. దాదాపు అన్నింటిలో ఇతరత్రా మేలిమి బ్లాగుల జాబితా కచ్చితంగా ఉంటుంది.

ఎవరికోసం... ఏమేం ఉన్నాయ్‌?
ఏమని బదులివ్వాలి? అందరికోసం... అన్నీ అని చెప్పొచ్చు. telugudanam-blog.blogspot.com లోని నీతి కథలు, భజనలు, భక్తిగీతాలు పిల్లలకు ఉపకరిస్తాయి. సమకాలీన పరిణామాలపై విశ్లేషణకు Sreekaram.wordpress.com, chaduvari.blogspot.com వంటివి క్లిక్‌ చేయొచ్చు. నవ్వుకోవడానికి telugu-jokes.blogspot.com, అద్భుతమైన సినిమా విశేషాలకు 24fps.co.in, చురకలు వేసే కార్టూన్లకు telugu-cartoons.blogspot.com...ఇలా చెబుతూ పోతే ఎన్నో.. ఎన్నెన్నో!

మున్ముందు తుపానే....
తెలుగు బ్లాగుల విస్తరణ ఈ మధ్యే మొదలైంది. ఇప్పటివరకు చూస్తే అలరించే, ప్రయోజనాన్ని అందించే, తెలుగు భాషను పరిపుష్ఠం చేసే రచనలే అధికం. కంప్యూటర్‌, నెట్‌ అందుబాటులోకి వచ్చి, సాంకేతిక పరిజ్ఞానంపై మరింత అవగాహన పెరిగిందంటే తెలుగు బ్లాగులు కుప్పలు తెప్పలుగా ఆరంభమవుతాయి. అదే జరిగితే 'ఆంధ్రుల చరితం అతి రస భరితం' అని మరోసారి ఆన్‌లైన్‌ సమూహాలు పాడుకుంటాయి.

ఇన్ని వివరాలు చదివాక మీకూ బ్లాగ్‌ ఆరంభించాలనుందా? మనసుకు తట్టిన అంశాల్ని తెలుగులో రాయాలనుందా?మీకూ ఛాన్సుంది.

మీరూ మొదలెట్టొచ్చు...
'గుండె గొంతుకలోన కొట్లాడుతాది... కూసుండనీదురా కూసింతసేపు...' అన్న తరహాలో మీరు బాధపడుతూ కూర్చోవల్సిన అవసరం లేదు. నలుగురికీ చెప్పాల్సిందేదో ఉండి, 'ఎలా ఎలా తెలుపను? మదిలోని భాషను..?' అని చింతించాల్సిన అగత్యం అంతకన్నా లేదు. నచ్చిన విషయం మీద ఓ తెలుగు బ్లాగును ఇవాళే ప్రారంభించండి. www.blogger.com లోకి వెళ్లి.. 'క్రియేట్‌ యువర్‌ ఓన్‌ బ్లాగ్‌'లో ఇచ్చే సూచనల ప్రకారం చెయ్యడమే. మీ బ్లాగ్‌కు మంగళవాద్యాలు మోగుతాయి. ఇక, భావాలు తేటతెలుగులో తెరపై కనిపించాలంటే, 'లేఖిని' వంటి సైట్లు సాయం చేస్తాయి. కాకపోతే కొత్తలో ఆ టైపింగ్‌కు కొద్దిగా అలవాటు పడాలంతే. ఇప్పటికే నడుస్తున్న తెలుగు బ్లాగుల్లో మీ అభిప్రాయం చెప్పాలన్నా లేఖిని లాంటి ఉపకరణాలను ఉపయోగించక తప్పదు. ఒకవేళ మీకు తెలుగు మాట్లాడటం తప్ప, చదవడం, రాయడం రాకపోయినా నో ప్రాబ్స్‌! ఎందుకంటే 'నిఖిలే' వంటి సైట్లు, మనం ఇంగ్లిష్‌లో రాస్తే, అక్షరాలు తెలుగులో కనిపించేలా చేస్తాయి!

* సామెతలు, జాతీయాలతో అల్లిన సరదా కథలకు - www.abhinayani.blogspot.com
* అన్నమాచార్య కీర్తనల కోసం - www.annamacharya-lyrics.blogspot.com
* పాత పాటల ఆణిముత్యాలు - www.geetalu.blogspot.com
* బరువు తగ్గడానికి పది ఉపాయాలు వంటి సరదా పూతరేక్స్‌ - www.gsnaveen.wordpress.com
* అవినీతి, తీవ్రవాదం, క్రికెట్‌తో సహా సమకాలీన అంశాలెన్నో - www.chaduvari.blogspot.com
* ఐన్‌స్టీన్‌, గాంధీతో సహా ప్రముఖుల జీవితాల్లోని విశేషాలు - www.maramaraalu.blogspot.com

Telugu blog blogs blogging blogger bloggers Andhra Pradesh Hyderabad India Indian language unicode eenadu article software computing engineers internet web www first largest