బుద్ధుడు నవ్వుచూ నిలిచెన్‌

రాజ్యభోగము వీడగలిగిన
రాకుమారుని రాతిజేసి
రాజధానిలొ నిలిపివేయగ
చిన్నగా నవ్వెన్‌ బుద్ధుడు నవ్వుచూ నిలిచెన్‌

పదవికోసం పాకులాటలు
కీర్తికోసం కీచులాటలు
ఓట్లకోసం ఊగులాటలు
చూడగా నవ్వెన్‌ బుద్ధుడు నవ్వుచూ నిలిచెన్‌

ప్రేమపక్షుల సరస శోభలు
ప్రేమవిఫలుల తొలుచు క్షోభలు
ప్రేమతెలియని బుడుత ఎడదలు
చూడగా నవ్వెన్‌ బుద్ధుడు నవ్వుచూ నిలిచెన్‌

మమతలేని బతుకు వద్దని
మార్కు రాని ఫలితమొద్దని
మార్గమిది యని చావ గోరుట
చూడగా నవ్వెన్‌ బుద్ధుడు నవ్వుచూ నిలిచెన్‌

ముదముతో ఘన పూజ సల్పిన
మురికి నీరే పార జేసిన
ముక్కు మూయక నోరు విప్పక
చూచుచూ నవ్వెన్‌ బుద్ధుడు నవ్వుచూ నిలిచెన్‌

నిదురరాని జనుల వ్యథలు
మేలుకోని వారి వెతలు
కలలు మాత్రము కనెడి కనులు
చూచుచూ నవ్వెన్‌ బుద్ధుడు నవ్వుచూ నిలిచెన్‌

మధ్యగోడలు లేని బాటలు
ఎడమ కుడియై కుడియె ఎడమై
కొంపగూల్చెడు రోడ్డు చావులు
చూచుచూ నవ్వెన్‌ బుద్ధుడు నవ్వుచూ నిలిచెన్‌

కినుకు చెంది బస్సు కాల్చి
బస్సులేదని కోపమందే
చిత్త వృత్తుల చేతనత్వము
చూచుచూ నవ్వెన్‌ బుద్ధుడు నవ్వుచూ నిలిచెన్‌

కలుషితంబగు గాలి నీరును
కడిగివేయుదు మనుచు పల్కుచు
ప్రజల యందే పొగను త్రాగగ
చూచుచూ నవ్వెన్‌ బుద్ధుడు నవ్వుచూ నిలిచెన్‌

పంటలెండి బతుకు మండి
వడ్డి తీర్పగ సాయ మందక
"చితి"కి పోయిన కలుగు సాయము
చూడగా నవ్వెన్‌ బుద్ధుడు నవ్వుచూ నిలిచెన్‌

విగ్రహాలకు పూజలొద్దని
వివరముగ బోధనలు జేసిన
వేల్పుయని విగ్రహము నిల్పగ
చూచుచూ నవ్వెన్‌ బుద్ధుడు నవ్వుచూ నిలిచెన్‌

- శ్రీనివాస్ నాగులపల్లి
[ Srinivas Nagulapalli ]
srini_nagul@yahoo.com